తల్లి రుణం తీర్చుకున్న తనయ.

దేవుడి గుండె బండయ్యింది .
ఆ తల్లి 'అండ' కొండెక్కింది !



ఈ తల్లి నిండుకుండైంది .
తనే కొడుకయ్యింది !


తొణకకుండా ..వణకకుండా
ఓ కొత్త ఒరవడికి 'తొలి' అడుగైంది .



మనకి తెలియదు కానీ ..
ఆ తల్లి గుండె కరిగి ..
కన్నీరై కురిసే ఉంటది ..
ఈ కూతురు కాళ్ళు కడిగేందుకు !!

మా తెలుగు తల్లికి మల్లెపూదండ

సిటీ లైఫ్

 పక్కింట్లో పసి పిల్లోడి కేరింత ..
మా ఊరి పెరటి తోట లో కోయిల పాటలా ....!
వాడి బుగ్గలు పుణికి ముద్దు చేయగలనా ..?!
మనుషుల మనసుల్లో ...
గోడలు కట్టేసుకున్న ఈ కాంక్రీట్ జంగిల్లో..
మా పక్కింటోల్లు ,ఎప్పటికీ...

'అపరచితులే' ..ఎన్నేలయినా!

ఆకాశం లో ...వెన్నెల చందమామ !

ఆకాశ హర్మ్యాం లో ఉన్నా ..

పొందలేనేమో మా 'పల్లె' పంచిన అనుభూతిని ..!

కొబ్బరాకుల సందుల్లోంచి జారి ముద్దాడే వెన్నెల హాయిని !!

మనిషి గా ఎదిగిపోతున్నా ..

నా మనసే "మరుగుజ్జు "అవుతుంది , చిత్రం గా ... !

చిన్నప్పటి స్నేహితురాలు ..

నా చిన్నప్పుడు .....
ఆమె వెండి మువ్వల పట్టీల
చప్పుడు ..నాకు వేకువ ఝామున ..
మేలుకొలుపు'!
ఆమె నవ్వు -మా ఊరి గోదారి అలల పాట !



పట్టు పరికిణీ కట్టిన 'పాలనురుగు' తను!
మా శెట్టి కొట్టులోకొచ్చిన కొత్త రంగు రిబ్బన్సు
కి ,బొట్టు బిల్లలకి మా ఊరి ' మోడల్ 'తను .



మా పిల్ల బ్యాచ్ కి 'రైలింజన్'తను .
మా కొత్త ఆలోచనలకి ,
అవిడియాలకి 'సెర్చ్ ఇంజిన్ ' తను.



నాకు దొరికిన చిలక్కొట్టిన
జాంపండు కి 'వాటా దారు 'తను .
నాకు పరీక్షల్లో వచ్చిన పాస్ మార్కులకి..
"దిక్కు -దారి "తను .



నేను బడి కి వెళ్ళేటపుడు 'మిత్రురాలు' తనే!
బడి నుండి వొచ్చాక....
తను మా అమ్మ ఒడిలో వాలి ...
గారాలు పోతున్నపుడు నా 'శత్రువు' తనే!!
ఇప్పుడు ...


పోయినా సంక్రాంతి పండక్కి కి నేను
ఊరెల్లినపుడు..మా ఊరొచ్చిన 'పుట్టింటి ఆడపడుచు'తను !
ఈ 'పెద్ద పండక్కి' వరకట్న పిచాశానికి బలై...
పెద్దల్లో కలిసిపోయిన 'నిండు ముత్తైదువ' తను!!
నాకు మాత్రం ...
ఎప్పటికీ జ్ఞాపకాల పుటల్లో ..
అపురూపం గా దాచుకునే ' నెమలికన్ను'తను.